har ghaḌi ik yahi ehsas-e-ziyan rahta hai
aag raushan thi jahan sirf dhuan rahta hai
ḳhatm hota hi nahin dasht ka ab sannaTa
koi mausam ho yahan ek saman rahta hai
aa ga.i raas mire dil ki udasi shayad
itni muddat bhi kahin daur-e-ḳhizan rahta hai
phuul khilte hain to murjha.e hue lagte hain
ik ajab ḳhauf sar-e-shaḳh-e-guman rahta hai
saaz ke taar hain TuuTe hue mutrib chup hain
ab fazaon men faqat shor-e-sagan rahta hai
rasta chalte hue log ThiThak jaate hain
har-qadam jaise tah-e-sang-e-garan rahta hai
main bhi ruk ja.un magar ruk nahin paata ‘alam’
ek dariya sa sada mujh men ravan rahta hai
Leave a Reply