Dilawar Ali Aazar
hava ne ism kuchh aisa paḌha tha
diya divar par chalne laga tha
main sehr-e-ḳhvab se uTTha to dekha
koi khiḌki men suraj rakh gaya tha
khaḌa tha muntazir dahliz par main
mujhe ik saaya milne aa raha tha
tire aane se ye uqda khula hai
main apne aap men rakkha hua tha
sabhi lafzon se tasviren bana.in
miri poron men manzar rengta tha
mujhe tere iradon ki ḳhabar thi
so gahri niind men bhi jagta tha
main jab maidan ḳhali kar ke aaya
mira dushman akela rah gaya tha
sabhi ke haath men patthar the ‘azar’
hamare haath men ik a.ina tha
Leave a Reply