koi tanha.i ka ehsas dilata hai mujhe
main bahut duur huun nazdik bulata hai mujhe
main ne mahsus kiya shahr ke hangame men
koi sahra men hai, sahra men bulata hai mujhe
tu kahan hai ki tiri zulf ka saaya saaya
har ghani chhanv men le ja ke biThata hai mujhe
ai mire hal-e-pareshan ke nigah-dar ye kya
kis qadar duur se a.ina dikhata hai mujhe
ai makin-e-dil-o-jan main tira sannaTa huun
main imarat huun tiri kis liye Dhata hai mujhe
rahm kar main tiri mizhgan pe huun aansu ki tarah
kis qayamat ki bulandi se girata hai mujhe
‘shaz’ ab kaun si tahrir ko taqdir kahun
koi likhta hai mujhe koi miTata hai mujhe
Leave a Reply