shakeel-badayuni

Dil Markaz-E-Hijab Banaya Na Jaega

dil markaz-e-hijab banaya na jaega

un se bhi raz-e-ishq chhupaya na jaega

sar ko kabhi qadam pe jhukaya na jaega

un ke nuqush-e-pa ko mitaya na jaega

be-vajh intizar dikhane se faeda

kah dijiye ki samne aaya na jaega

ankhon men ashk qalb pareshan nazar udaas

is tarah un ko chhod ke jaaya na jaega

vo khud kahen to sharh-e-mohabbat bayan karun

naghma baghair saaz sunaya na jaega

behtar yahi hai zikr-e-mohabbat na chhediye

naqsha bigad gaya to banaya na jaega

dil ki taraf ‘shakil’ tavajjoh zarur ho

ye ghar ujad gaya to basaya na jaega

More Poems

Leave a Comment