sukun luTta rahega faza hi aisi hai
hamare shahr ki ab-o-hava hi aisi hai
kabhi na aa.egi honTon par ab hansi ki tarah
vo ek baat ki jis ki ada hi aisi hai
dahakti dhuup men savan ki tarah rahta huun
mire buzurg ke lab ki dua hi aisi hai
kisi ke husn-e-sama.at pe Thes kyon na lage
kisi ke honTon pe ab ke sada hi aisi hai
sulagti aag men shabnam ki kaifiyat pa.un
mire gunah ki yaaro saza hi aisi hai
Leave a Reply