Iftikhar Naseem
vo mila mujh ko na jaane ḳhol kaisa oḌh kar
raushni gum ho ga.i apna hi saaya oḌh kar
niind se bojh hain patte unghte se peḌ hain
shahar soya hai ḳhamoshi ka labada oḌh kar
DhunDhta phirta tha main har shaḳhs ke asli nuqush
log milte the mujhe chehre pe chehra oḌh kar
munjamid sa ho gaya huun ḳhunki-e-ehsas se
dhuup bhi nikli hai lekin tan pe kapḌa oḌh kar
rang saare dho gaya hai raat ka badal ‘nasim’
aur ghar nange hue paani barasta oḌh kar
Leave a Reply