log hansne ke liye rote hain akasr dahr men
talkhiyan khud hi mila lete hain mithe zahr men
pyaar ke chashmon ka paani jab se khara ho gaya
saari duniya ghir gai hai nafraton ke qahr men
vaqt kahta hai ubharte dubte chehron ko dekh
aaj to raunaq badi hai hadson ki nahr men
jaane ye hiddat chaman ko raas aae ya nahin
aag jaisi kaifiyat hai khushbuon ki lahr men
ham ne palkon par saja rakhe hain ashkon ke charagh
ek mela sa laga hai raushni ke shahr men
chand avazen taaqub men hain ‘afzal’ aaj bhi
qurbaton ka shahd hai tanhaiyon ke zahr men
Leave a Reply