hargiz kabhi kisi se na rakhna dila gharaz
jab kuchh gharaz nahin to zamane se kya gharaz
phaila ke haath muft men honge zalil ham
mahrum tere dar se phiregi dua gharaz
duniya men kuchh to ruuh ko is jism se hai kaam
milta hai varna kaun kisi se bila gharaz
vasl o firaq o hasrat o ummid se khula
hamrah hai har ek baqa ke fana gharaz
ik phir ke dekhne men gai saikdon ki jaan
teri har ik ada men bhari hai jafa gharaz
dekha to tha yahi sabab-e-hasrat-o-alam
majbur ho ke tark kiya muddaa gharaz
kyunkar na ruuh o jism se ho chand din milap
is ko juda gharaz hai to us ko juda gharaz
ilzam ta-ki sar pe kisi tarah ka na ho
ai ‘shad’ dhundti hai bahane qaza gharaz