Shakeel Badayuni
abhi jazba-e-shauq kamil nahin hai
ki begana-e-arzu dil nahin hai
koi parda-e-raz haail nahin hai
sitam hai vo phir bhi muqabil nahin hai
sar ankhon pe nairangi-e-bazm-e-alam
jise khauf-e-gham ho ye vo dil nahin hai
masarrat-ba-daman huun sailab-e-gham men
koi mauj mahrum-e-sahil nahin hai
mohabbat se bach kar kahan jaiyega
talatum hai aghosh-e-sahil nahin hai
vo kis naz-o-andaz se kah rahe hain
‘shakil’ ab mohabbat ke qabil nahin hai
Leave a Reply