kanon ko hai bhaa.i hui taqrir kisi ki
a.ankhon men sama.i hui tasvir kisi ki
kuchh ishq men chalti nahin tadbir kisi ki
sar phoḌ jo rah jaa.e hai taqdir kisi ki
har zarre men hai jalva har ik qatre men hai aab
hai arsh pe chha.i hui tanvir kisi ki
andaz buton ke nahin aate hain nazar men
rahti hai nigahon men jo tasvir kisi ki
ḳhat paḌh ke kahin aur bigaḌ baiThe na yarab
yaad aa.i hai abru dam-e-tahrir kisi ki
ye girya-o-zari dil-e-betab kahan tak
rusva kahin ho jaa.e na taqsir kisi ki
ik muntazir-e-did ki pathra ga.iin ankhen
taḳhir kisi ki hui ta.azir kisi ki
main faḳhr se kahta huun mujhe tum se hai ulfat
baḌhti hai tire naam se tauqir kisi ki
ruḳh pher magar sar na hile dekh ki zalim
aTki hai tiri zulf men taqdir kisi ki
mehman hai koi din ke, chale ja.enge ‘rahbar’
baiThenge nahin daab ke jagir kisi ki
Leave a Reply