mohabbat kya baḌhi hai vahm baham baḌhte jaate hain
ham un ko azmate hain vo ham ko azmate hain
na ghaTti shan-e-mashuqi jo aa jaate ayadat ko
bure vaqton men achchhe log aksar kaam aate hain
jo ham kahte nahin munh se to ye apni muravvat hai
churana dil ka zahir hai ki vo ankhen churate hain
saman us bazm ka barson hi guzra hai nigahon se
kab aise-vaise jalse apni ankhon men samate hain
kahan tak imtihan kab tak mohabbat azmaoge
unhin baton se dil ahl-e-vafa ke chhuT jaate hain
ḳhumar ankhon men baaqi hai abhi tak bazm-e-dushman ka
tasadduq us DhiTa.i ke nazar ham se milate hain
dil ik jins-e-giran-maya hai lekin aankh valon men
ye dekhen husn vaale is ki qimat kya lagate hain
kisi ke sar ki aafat ho hamare sar hi aati hai
kisi ka dil koi taake magar ham choT khate hain
ga.e vo din ki naame chaak hote the ‘hafiz’ apne
hasin ab to miri tahrir ankhon se lagate hain
Leave a Reply