duniya Tujhe Chahe Kuchh Bhi Kahe Hum Jaan-e-Tamanna Kahte Hain

duniya tujhe chahe kuchh bhi kahe ham jan-e-tamanna kahte hain

ham teri nazar men ghair sahi phir bhi tujhe apna kahte hain

phulon men misl-e-gulab hai tu taron men hasin mahtab hai tu

tu sab se achchha lagta hai tujhe sab se achchha kahte hain

tu dilbar hai dil-dar hai tu tu jan-o-dil se pyara hai

fitrat ne jis ko sanvara hai tujhe husn sarapa kahte hain

koi ishq ki tujh ko jaan kahe koi dil ka tujhe arman kahe

dil valon ki is basti men tujhe aur bhi kya kya kahte hain

pal-bhar ke liye aram nahin ab us ke siva koi kaam nahin

tiri surat dekha karte hain tujh ko aina kahte hain

tu laakh chhupae ishq magar chehre se ayaan ho jaata hai

kahne vaale to duniya men mujhe aaj bhi tera kahte hain