ḳhud-baḳhud alam-e-dil zer-o-zabar hota hai
nichi nazron men qayamat ka asar hota hai
diid kya chiiz hai jalvon men nazar kho jaana
varna jalva kahin paband-e-nazar hota hai
ahl-e-himmat ke qadam is se alag uThte hain
ruḳh zamane ki havaon ka jidhar hota hai
teri duniya men kahin par bhi karun main sajda
tera jalva to mire pesh-e-nazar hota hai
shart hai dard men Duuba hua afsana ho
dil to kya chiiz hai patthar pe asar hota hai
jab uThata huun qadam rah-e-adab men ‘sharib’
mere hamrah mira zauq-e-nazar hota hai
Leave a Reply