miri zindagi hai tanha tumhen kuchh asar to hota
koi dost tum sa hota koi ham-safar to hota
ye tamam saa.e apne chalun kab talak sameTe
koi ham-nashin to hota koi chara-gar to hota
kabhi kuchh guman hota mujhe manzilon ka apni
jise apna ham ne samjha vahi rahbar to hota
main kahan se la.un qismat jo banun tumhare qabil
ki tumhare ghar ke aage mira koi ghar to hota
hai ajiib kashmakash men ye ‘saba’ ki bandagi bhi
kabhi un ke dar ke laa.eq kabhi mera sar to hota
Leave a Reply