Waseem Barelvi
na jaane kyuun mujhe us se hi khauf lagta hai
mire liye jo zamane ko chhod aaya hai
andheri shab ke havalon men us ko rakkha hai
jo saare shahr ki ninden uda ke soya hai
rafaqaton ke safar men to be-yaqini thi
ye fasla hai jo rishta banae rakhta hai
vo khvab the jinhen ham mil ke dekh sakte the
ye bar-e-zist hai tanha uthana padta hai
hamen kitabon men kya dhundne chale ho ‘vasim’
jo ham ko padh nahin paae unhin ne likkha hai
Leave a Reply