Sahir Ludhianvi
jiyo to aise jiyo jaise sab tumhara hai
maro to aise ki jaise tumhara kuchh bhi nahin
ye ek raaz ki duniya na jis ko jaan saki
yahi vo raaz hai jo zindagi ka hasil hai
tumhin kaho tumhen ye baat kaise samjhaun
ki zindagi ki ghutan zindagi ki qatil hai
har ik nigah ko qudrat ka ye ishara hai
jahan men aa ke jahan se khinche khinche na raho
vo zindagi hi nahin jis men aas bujh jaae
koi bhi pyaas dabae se dab nahin sakti
isi se chain milega ki pyaas bujh jaae
ye kah ke mudta hua zindagi ka dhara hai
ye asman ye zamin ye faza ye nazzare
taras rahe hain tumhari miri nazar ke liye
nazar chura ke har ik shai ko yuun na thukrao
koi sharik-e-safar dhund lo safar ke liye
bahut qarib se main ne tumhen pukara hai
Leave a Reply