poet

Hum Na-Qishon Ke Daur Mein Kaamil Hue To Kya

ham na-qishon ke daur men kamil hue to kya

ujde hue ilaqe ke aamil hue to kya

ham ko to iftikhar hai paigham-e-yar par

jibril asman se nazil hue to kya

muddat se phir rahi hai chhuri jan-e-zar par

ham aaj tegh-e-yar se bismil hue to kya

daghon men us ke dagh-e-mohabbat ki bu kahan

laale ke phuul ham se muqabil hue to kya

rahat nasib ham ko hui rahmat ai karim

takra ke sar bahisht men dakhil hue to kya

phulon men zar luta na gul-e-surkh ka kabhi

be-faiz log raunaq-e-mahfil hue to kya

us ki sifat yahi hai ki be-mange di murad

dargah men karim ke saail hue to kya

asan hain jo nakhun-e-taqdir tez hai

matlab hamare uqda-e-mushkil hue to kya

murdon ko zinda kijiye nam-avari ye hai

iisa banao aap ko qatil hue to kya

har-dam charagh-e-dil ki idhar lau lagi rahe

ham apni yadgar se ghafil hue to kya

hoga na ek rang khizan-o-bahar ka

budhe agar javanon ke shamil hue to kya

apne maal-e-kar se jab be-khabar hue

hafiz hue to khaak jo fasil hue to kya

tan se mafariqat nahin karti tab-e-firaq

taaviz bhi gale men hamail hue to kya

ai ‘bahr’ baghban ki minnat bala kare

do-char phuul baagh se hasil hue to kya

More Poems

Leave a Comment