pahle to bahut gardish-e-dauran se laḌa huun
ab kis ki tamanna hai jo maqtal men khaḌa huun
go qadr miri bazm-e-suḳhan men nahin lekin
hiire ki tarah fan ki anguThi men jaḌa huun
ḳhairat men banTe the jahan main ne sitare
ḳhud aaj vahin kas-e-shab le ke khaḌa huun
hota koi patthar bhi to kaam aata junun ke
TuuTa hua shisha huun sar-e-rah paḌa huun
simTun to kisi siip ke siine men sama ja.un
ai ‘prem’ jo phailun to samundar se baḌa huun
Leave a Reply