main sochta huun kinara karun mohabbat se
guzar hi ja.un kisi din maqam-e-ibrat se
main ek taḳhta-e-yaḳh ko pakaḌ ke bahta huun
bhanvar ki aankh mujhe tak rahi hai hairat se
ajab nahin ki junun men ye mo.ajiza bhi ho
main iḳhtiyar men aa ja.un apne vahshat se
ghubar-e-ḳhvab uḌa ke guzar gaya koi
lagi thi aankh miri chandni men ghaflat se
nazar ko Dhiil na do is qadar nazare par
ki saara kaam bigaḌ jaa.e us ki ujlat se
mujhe vajud ke phailao ne kiya taqsim
main aqliyat men ab aaya huun apni kasrat se
ye kaun ḳhana-e-dil main mire chhupa hai jo
dariche khol raha hai tiri ijazat se
Leave a Reply