bas is qadar hai khulasa miri kahani ka
ki ban ke tuut gaya ik habab paani ka
mila hai saaqi to raushan hua hai ye mujh par
ki hazf tha koi tukda miri kahani ka
mujhe bhi chehre pe raunaq dikhai deti hai
ye moajiza hai tabibon ki khush-bayani ka
hai dil men ek hi khvahish vo duub jaane ki
koi shabab koi husn hai ravani ka
libas-e-hashr men kuchh ho to aur kya hoga
bujha sa ek chhanaka tiri javani ka
karam ke rang nihayat ajiib hote hain
sitam bhi ek tariqa hai mehrbani ka
‘adam’ bahar ke mausam ne khud-kushi kar li
khula jo rang kisi jism-e-arghavani ka
Leave a Reply