Kawish

naya din roz mujh ko kitna pichhe phenk deta hai

ye aaj andaza hota hai ki main ahista ahista

hazaron miil ki duuri pe tum se aa gaya aur ab

dinon salon mahinon ko ikattha kar ke gum-gashta

dayar-e-hu men baitha huun na kuchh aage na kuchh pichhe

siva kuchh vasvason ke kuchh khasaron ke kamar-basta

kahin chalne ko aage jis ka vazeh kuchh tasavvur hi nahin koi

hamare sab masail jin ka ham par bojh hai itna

hamari kisht-e-be-maya hain is sahra men kya boya

bagulon ke siva kuchh garm jhonkon ke siva ham ne

chalo ik tez dhare men kahin par Daal den kashti

latafat thande paani ki karen mahsus kuchh thoda bikhar jaaen

hansen be-vajh yunhi ghul machaen be-sabab dauden

uden un badalon ke pichhe aur milon nikal jaaen

Leave a Comment