Daghon Se Dil-O-Sina Ke afroKHta-Jaan Hun

dāġhoñ se dil-o-sīna ke afroḳhta-jāñ huuñ

go maiñ chaman-e-tāza huuñ par vaqf-e-ḳhizāñ huuñ

pahlū meñ agar dil hai to tū dil meñ hai mere

go nañg-e-ḳhalā.eq huuñ magar jān-e-jahāñ huuñ

jis ḳhaak pe maiñ baiTh gayā fitna uThāyā

kis sarv-e-ḳhirāmāñ kī kaf-e-pā kā nishāñ huuñ

hamrāh tumhāre huuñ kisī jā huuñ kahīñ huuñ

saaya kī tarah tum ho jahāñ maiñ bhī vahāñ huuñ

yārab ho burā vahshat dil kā ki nahīñ chain

jab ḳhaak huā mar ke to ab reg-e-ravāñ huuñ

kyā ziist hai ye ḳhaak mirī āshiq-e-nāshād

gah masraf-e-fariyād huuñ gah vaqf-e-fuġhāñ huuñ

Leave a Comment