Jahanzeb Sahir
lage hue the sabhi shor hi machane men
jabhi to der lagi aag ko bujhane men
vagarna mujh se koi kaam hi na ho paa.e
kuchh aisi barkaten hain tere muskurane men
ajiib saa.e sukunat kiye hue the yahan
baḌa sukun mila hai ye ghar jalane men
bacha saka na tira ishq dukh to hai lekin
laga hua huun main ab naukri bachane men
jo ho sake to mire hijr men izafa kar
ki mujh se der hui tujh se dil lagane men
baha ke le gaya dariya tamam basti ko
magar ye log rahe kashtiyan banane men
mire makan ke andheron ko kaun samjha.e
ḳhushi mili jo hava ko diya bujhane men
jo naam ham ne kamaya hai ishq men ‘sahir’
janab-e-qais ko sadiyan lagin kamane men
Leave a Reply