Suno! Ab Hum Mohabbat Mein Bahut Aage Nikal Aae

Khalid Moin

suno! ab ham mohabbat men bahut aage nikal aa.e

ki ik raste pe chalte chalte sau raste nikal aa.e

agarche kam na thii, charagaran-e-shahr ki pursish

magar! kuchh zaḳhm-e-na-dida bahut gahre nikal aa.e

mohabbat ki to koi had, koi sarhad nahin hoti

hamare darmiyan ye fasle, kaise nikal aa.e

bahut din tak hisar-e-nashsha yakta.i men rakkha

phir is chehre ke andar bhi ka.i chehre nikal aa.e

purane zaḳhm bharte hii, na.e zaḳhmon ke shaida.i

mizaj-e-a.ina oḌhe hue ghar se nikal aa.e

tazad-e-zat ke baa.is khula vo kam-suḳhan aisa

adhuri baat ke mafhum bhi puure nikal aa.e