shab-e-siyah ka anchal sarak chuka hai bahut
andheri raat men jugnu chamak chuka hai bahut
ra.is-e-shahr mira aur imtihan na le
ki mere sabr ka saghar chhalak chuka hai bahut
na kaam aa.egi ab sham-e-dil ki tabani
ta.alluqat ka sho.ala bhaḌak chuka hai bahut
chale bhi aao ki mil kar mana.en jashn-e-bahar
hamare shauq ka ghuncha chaTak chuka hai bahut
tumhare rishte ki ab parvarish nahin mumkin
ki mere dil men ye kanTa khaTak chuka hai bahut
mila na kuchh bhi use meri ḳhamiyon ka suragh
vo meri zaat ki miTTi phaTak chuka hai bahut
bata de manzil-e-maqsud ka nishan us ko
ki apni raah se insan bhaTak chuka hai bahut
usul-e-mai-kashi ‘ma.asum’ ko sikha.en na aap
vo pi chuka hai bahut aur bahak chuka hai bahut
Leave a Reply