samne aa.ina tha masti thi
un par ik shan-e-ḳhud-parasti thi
mujh ko ka.abe men bhi hamesha shaiḳh
yad-e-ayyam-e-but-parasti thi
sirf dil hi nahin jala mera
zarre zarre men us ke basti thi
kyuun zuleḳha tiri adalat men
husn ki jins aisi sasti thi
sujhta tha na intizar men kuchh
dekhne ko nigah tarasti thi
dekhne ham ga.e the qabr-e-‘aziz’
haa.e kya bekasi barasti thi
Leave a Reply