Khursheed Rizvi
kahan huun main ki mira koi ashna bhi nahin
kisi ka zikr to kya ghar men aa.ina bhi nahin
rahe ḳhamosh to TuuTa na rishta-e-ummid
pukarte to ḳharabon men koi tha bhi nahin
tiri sada pe to sadiyan bhi lauT aati hain
mujhe bala men kuchh aisa shikasta-pa bhi nahin
ye aur baat ki naqsh-e-qadam dikha.i na den
magar vo arsa-e-dil se abhi gaya bhi nahin
is e’tiraf se ras ghul raha hai kanon men
vo e’tiraf jo us ne abhi kiya bhi nahin
jis ek chiiz se tera firaq asan hai
vo ek chiiz tiri yaad ke siva bhi nahin
mira bharam hain taghaful-shi.ariyan teri
tu puchh le to mira koi mudda.a bhi nahin
musalahat bhi nahin hai sarisht men apni
magar kisi se tasadum ka hausla bhi nahin
na jaane kab na rahen ham hamen ghanimat jaan
hayat-o-maut men kuchh aisa fasla bhi nahin
ma.al-e-kar-e-qana.at hai so abhi se sahi
vagarna tul-e-tamanna ki intiha bhi nahin
Leave a Reply