aaj ki shab jaise bhi ho mumkin jagte rahna
koi nahin hai jaan ka zamin jagte rahna
qazzaqon ke dasht men jab tak qafila Thahre
qafile vaalo raat ho ya din jagte rahna
tariki men lipTi hui pur-haul ḳhamoshi
is aalam men kya nahin mumkin jagte rahna
aahaT aahaT par jaane kyuun dil dhaḌke hai
koi nahin atraf men lekin jagte rahna
ThanDi havaon ka ai dil ehsan na uThana
koi yahan hamdard na mohsin jagte rahna
rah-numa sab dost hain lekin ai ham-safro
dost ka kya zahir kya batin jagte rahna
taron ki ankhen bhi bojhal bojhal si hain
koi nahin ab ‘sha.ir’ tujh-bin jagte rahna
Leave a Reply