sang-rezon ki tarah pesh-e-nazar rahte hain
mere kaase men paḌe la.al-o-gohar rahte hain
saa.e chunte hain kaḌi dhuup ke sahra se ham
pa-shikasta hain magar mahv-e-safar rahte hain
kaal koyal ki sada.en na shafaq rang kahin
shahr men jaane kahan sham-o-sahar rahte hain
khelte hain mire angan men vo ḳhush ḳhush baham
ranj ḳhushiyon se bahut shir-o-shakar rahte hain
ḳhema-zan ho to ga.e ḳhana-badoshi na ga.i
be-ghari men bhi sada dosh pe ghar rahte hain
qahat-sali hai basirat ki nagar men ‘sabir’
kor-chashmon se yahan ahl-e-nazar rahte hain
Leave a Reply