aah ko samjhe ho kya dil se agar ho ja.egi
vo to vo un ke farishton ko ḳhabar ho ja.egi
puuri kya muusa tamanna tuur par ho ja.egi
tum agar uupar ga.e nichi nazar ho ja.egi
kya in aahon se shab-e-gham muḳhtasar ho ja.egi
ye sahar hone ki baten hain sahar ho ja.egi
aa to ja.enge vo meri ah-e-pur-tasir se
mahfil-e-dushman men rusva.i magar ho ja.egi
kis se puchhenge vo mere raat ke marne ka haal
tu bhi ab ḳhamosh ai sham-e-sahar ho ja.egi
ye bahut achchha hua a.enge vo pichhle pahar
chandni bhi ḳhatm jab tak ai ‘qamar’ ho ja.egi
Leave a Reply