Wafa Ki Shama Jalao Ki Hum Ghazal Kah Len

Marghoob Asar Fatmi

vafa ki sham.a jalao ki ham ghazal kah len

udaas raat hai aao ki ham ghazal kah len

kisi ke saath guzare hue hasin lamho

tum aaj yaad to aao ki ham ghazal kah len

bikhere jaao fazaon men aaj tum naghme

sunao giit sunao ki ham ghazal kah len

tumhare husn ka charcha hai chand-taron men

kabhi zamin pe aao ki ham ghazal kah len

kisi ki yaad ki mash.al jala jala ke ‘asar’

andhera gham ka miTao ki ham ghazal kah len