ye thiik hai ki bahut vahshaten bhi thiik nahin
magar hamari zara adaten bhi thiik nahin
agar milo to khule dil ke saath ham se milo
ki rasmi rasmi si ye chahaten bhi thiik nahin
taalluqat men gahraiyan to achchhi hain
kisi se itni magar qurbaten bhi thiik nahin
dil o dimagh se ghayal hain tere hijr-nasib
shikasta dar bhi hain un ki chhaten bhi thiik nahin
qalam utha ke chalo hal-e-dil hi likh daalo
ki raat din ki bahut furqaten bhi thiik nahin
tum ‘e’tibar’ pareshan bhi in dinon ho bahut
dikhai padta hai kuchh sohbaten bhi thiik nahin
Leave a Reply