dekhiye kitne sukhan-fahm sukhan-var aae
main ne ik phuul uthaya kai patthar aae
kar chuke tark-e-taalluq to use sochna kya
dil se nikla hai to vo yaad bhi kyuun kar aae
phir vahi raat ho badal hon hava chalti ho
phir vahi chand darakhton se nikal kar aae
raah hamvar muqaddar men nahin thi shayad
paanv nikla tha abhi ghar se ki patthar aae
ek do gam-e-masafat thi tiri galiyon ki
saari duniya ki thakan laad ke ham ghar aae
jang jaari hai abhi jagte rahiye shab-bhar
jaane kas ot se chhup kar koi lashkar aae
kya koi gham ke ganvane ka hunar haath aaya
muskurate hue jo ranj ke khugar aae
dekh kar jis ki jhalak jaan men jaan aati thi
ab sar-e-rah use dekh ke chakkar aae
is baras phuul zyada na sahi shakhon par
barishen kam thiin magar rang barabar aae
ab to is niind men chalte hue ukta gae ham
ab to behtar hai kisi mod pe thokar aae
ek do pal to faramosh bhi kar den us ko
haan agar shakhs koi yaad barabar aae
gham-gusaron men mire charagaron men aksar
mere dushman bhi kai bhes badal kar aae
log kis khvab se rote hue uthe ‘janan’
jaane kis qarya-e-matam se ye bahar aae