mauj-e-ḳhayal men na kisi jal-pari men aa.e
dariya ke saare rang miri tishnagi men aa.e
phir ek roz aan mila abr-e-ham-mizaj
miTTi numu-e-pazir hui tazgi men aa.e
daman bacha rahe the ki chehra bhi jal gaya
kis aag se guzar ke tiri raushni men aa.e
ye main huun mere ḳhvab ye shamshir-e-be-niyam
ab tera iḳhtiyar hai jo tere ji men aa.e
ik baar is jahan se mil lena chahiye
aisa na ho ki phir ye faqat ḳhvab hi men aa.e
ankhon men vo lapak hai na siine men vo alaav
is baar us se kahna zara sadgi men aa.e
tanha udaas dekh raha tha main chand ko
ye phuul bahte bahte kahan se nadi men aa.e
thak-har kar gira tha ki ankhon men phir ga.e
‘tauqir’ vo maqam jo avargi men aa.e
Leave a Reply