Poet
falak ki gardishen aisi nahin jin men qadam Thahre
sakun dushvar hai kyunkar tabi.at koi dam Thahre
qaza ne doston se dekhiye aḳhir kiya nadim
kiye the ahd-o-paiman jis qadar vo kul adam Thahre
chhua tu ne jise maara use ai afa.i-e-gesu
ye sab tiryaq mere tajraba karne men sam Thahre
kiya jab ghaur koson duur nikli manzil-e-maqsad
kabhi gar pa-e-shal uTThe to chal kar do qadam Thahre
laga kar dil juda hona na thi shart-e-vafa sahab
gham-e-furqat ki shiddat se karam jaur-o-sitam Thahre
jo kuchh dekha vo a.ina tha aane vaali halat ka
jahan dekha yahi a.ankhon ke kanse jam-e-jam Thahre
amal kahne pe apne hazrat-e-va.iz karen pahle
gunah ke mo’tarif jab hain to vo kab mohtaram Thahre
javani ki siyah-masti men vasf-e-zulf likkha tha
baḌha vo silsila aisa ki ham mushkin qalam Thahre
ye sabit hai ki mutlaq ka ta.ayyun ho nahin sakta
vo salik hi nahin jo chal ke ta-dair-o-haram Thahre
bashar ko qaid-e-kulfat maya-e-andoh-o-afat hai
rahe achchhe jo is mehman-sara men aa ke kam Thahre
‘habib’-e-na-tavan se rah-e-ulfat tai nahin hoti
ajab kya gar ye rasta jada-e-mulk-e-adam Thahre
Leave a Reply