mauj-e-gham-e-hayat sharabor kar ga.i
ḳhamosh dhaḌkanon men baḌa shor kar ga.i
be-ḳhud sa ho gaya tha main raqs-o-surur men
aur us ki ham-nava.i mujhe mor kar ga.i
main ho ke ba-vafa bhi to ik be-vafa raha
nazron men meri mujh ko hi vo chor kar ga.i
simTi si laḌki de ga.i paigham aḳhirash
nazuk kala.i us ki bhi kuchh zor kar ga.i
mujh pe hayat kaisa ye ehsan kar diya
har faisla mira tu lab-e-gor kar ga.i
aansu shab-e-firaq men ruk hi nahin sake
zabt-e-sada ko meri vo kamzor kar ga.i
‘aslam’ jo dard-e-jan tha vo jan-e-hayat hai
nazuk ye kaam rishte ko ik Dor kar ga.i
Leave a Reply