husn ankhon men rahe dil men javani to rahe
zindagani tere hone ki nishani to rahe
us ki ḳhatir to gavara koi ban-bas bhi hai
sab ke honTon pe miri ram-kahani to rahe
zabt men ye bhi hai goya.i ka apna andaz
lab hon ḳhamosh magar ashk-fishani to rahe
gar ujalon se gurezan hai dhundlakon men to aa
din ba-har-taur kaTa shaam suhani to rahe
tu na shirin na main farhad magar yuun to milen
ham rahen ya na rahen apni kahani to rahe
aao kuchh der karen pahle-pahal ki baten
yaad is pyaar ki vo rasm purani to rahe
teri ankhen to banen ḳhushk jazire ‘ja.afar’
ye jo dariya hain to dariyaon men paani to rahe
Leave a Reply