jo ḳhat hai shikasta hai jo aks hai TuuTa hai
ya husn tira jhuTa ya aa.ina jhuTa hai
ham shukr karen kis ka shaki hon to kis ke huun
rahzan ne bhi luuTa hai rahbar ne bhi luuTa hai
yaad aaya in ankhon ka paiman-e-vafa jab bhi
saghar mire hathon se be-saḳhta chhuTa hai
har chehre pe likkha hai ik qissa-e-mazlumi
bedard zamane ne har shaḳhs ko luuTa hai
manzil ki tamanna men sar-garm-e-safar hain sab
kaun us ke liye ro.e jo raah men chhuTa hai
allah re ‘hafiz’ us ka ye zauq-e-ḳhud-ara.i
jab zulf sanvari hai ik aa.ina TuuTa hai
Leave a Reply