Fauj-E-Mizhgan Ka Kuchh Irada Hai

fauj-e-mizhgan ka kuchh irada hai

zulf-e-pechan ne laam bandha hai

lab-e-rangin ko kis ne chusa hai

dekh lo ye aqiiq jhuta hai

kaun aaya chhadi savari se

ne savari ka kis ki shohra hai

daant khatte hue anaron ke

un ka seb-e-zaqan ye mitha hai

bosa-e-lab diya jo bigde ghair

phuut men tum ne qand Daala hai

katte ho hamare naam ke harf

khuub shosha hai zor-e-fiqara hai

vasf-e-qad ke do-chand hain mazmun

koi misraa nahin hai dohra hai

daant kanghi ka he magar mujh par

mar-e-gesu jo kaate khata hai

khuub hai vasl-e-ashiq-o-maashuq

ye bhi jodi ka ek nuskha hai

zakhm-e-dil par namak chhidak-vao

zaiqa mere munh ka phika hai

ghair ke ghar baja rahe ho sitar

tum ne dar-parda thaat badla hai

koi taaza kuaan jhakaenge

in dinon ikhtilat gahra hai

chutki angiya men tum na takvao

gore siine men niil padta hai

bosa honton ka mil gaya kis ko

dil men kuchh aaj dard mitha hai

chain se hain faqir baad-e-fana

qabr ke bhi sirhane takiya hai

ai ‘munir’ aap kyuun hain azurda

ye to kahiye mizaj kaisa hai

Leave a Comment