Ahmad Khayal
dasht o junun ka silsila mere lahu men aa gaya
ye kis jagah pe main tumhari justuju men aa gaya
vo sarv-qamat ho gaya hai dekhte hi dekhte
jaane kahan se zor sa us ki numu men aa gaya
bas chand lamhe pesh-tar vo paanv dho ke palta hai
aur nuur ka sailab sa is aabju men aa gaya
charon taraf hi titliyon ke raqs hone lag gae
tu aa gaya to baagh saara rang-o-bu men aa gaya
main jhumte hi jhumte ‘ahmad’ tamasha ban gaya
jab aks us ke raqs ka mere subu men aa gaya
Leave a Reply