qismat bure kisi ke na is tarah laa.e din
aafat na.i hai roz musibat hai aa.e din
din san ye aur din diye allah ki panah
us maah ne to ḳhuub hi ham se gina.e din
hai dam-shumari din ko to aḳhtar-shumari shab
is tarah to ḳhuda na kisi ke kaTa.e din
un ki nazar phiri ho to kya apne din phiren
abr-e-siyah ghira ho to kya munh dikha.e din
ji janta hai kyunki ye kaTte hain roz o shab
dushman ko bhi ḳhuda na kabhi ye dikha.e din
kya lutf-e-zist bharte hain din zindagi ke ham
‘kaifi’ bure kisi ke na taqdir laa.e din
Leave a Reply