bas ik nazar men dil-o-jan figar karta hai
vo shaḳhs kitne saliqe se vaar karta hai
tumhari chaal se to maat kha gaya vo bhi
vahi jo uḌte parinde shikar karta hai
ye marhala bhi kisi imtihan se kam to nahin
vo shaḳhs mujh pe bahut e’tibar karta hai
ye kis ka husn mahakta hai mere sheron men
ye kaun hai jo inhen ḳhush-gavar karta hai
tumhare gham ko men dil se laga ke rakhta huun
yahi to hai jo mujhe ba-vaqar karta hai
Leave a Reply