mira ye malba mira ḳharaba tumhari yadon se laḌ raha hai
usi ki ta.amir ho rahi hai vo ek ghar jo nahin bacha hai
paḌe hue hain jali-bujhi cigareton ke TukḌe har ik jagah par
aur ek chehra shagufta chehra tamam ghar men basa hua hai
laga rahi hai mujhe sada-e-hava dariche se laḌte laḌte
mira ye kamra ḳhamosh kamra kisi ki aahaT se bhar gaya hai
kahin se saaye bhi aa ga.e hain mujhe sunane kahani apni
koi fasana bhi dhire dhire buland manzar se ho raha hai
bula rahin hain mujhe dobara udasiyon ki hasin vaadi
kisi ki yadon ka sabz-mausam abhi bhi taaza bana hua hai
jo rang-roghan bikhar rahe hain tamam ghar men ata hai us ki
bas ek aamad se us ki viran khanDar sa ye ghar bhi ji uTha hai
Leave a Reply