Naz-Parwarda-E-Jahan Tum Ho

nāz-parvarda-e-jahāñ tum ho

dard-o-ġham ho jahāñ jahāñ tum ho

ye zamīñ bhī agar nahīñ merī

haa.e kyuuñ zer-e-āsmāñ tum ho

maiñ ne kī thī shikāyat-e-darūñ

be-sabab mujh se bad-gumāñ tum ho

maiñ zamāne se ḳhud samajh letā

vaqt ke mere darmiyāñ tum ho

phūTtī hai vahīñ se dard kī lai

parda-e-sāz meñ jahāñ tum ho

tum ko pā kar bhī sochtā huuñ yahī

kyā faqat ranj-e-rā.egāñ tum ho

Leave a Comment