ham se shayad hi kabhi us ki shanasa.i ho
dil ye chahe hai ki shohrat ho na rusva.i ho
vo thakan hai ki badan ret ki divar sa hai
dushman-e-jan hai vo pachhua ho ki purva.i ho
ham vahan kya nigah-e-shauq ko sharminda karen
shahr ka shahr jahan us ka tamasha.i ho
dard kaisa jo Dubo.e na baha le jaa.e
kya nadi jis men ravani ho na gahra.i ho
kuchh to ho jo tujhe mumtaz kare auron se
jaan lene ka hunar ho ki masiha.i ho
tum samajhte ho jise sang-e-malamat ‘irfan’
kya ḳhabar vo bhi koi rasm-e-pazira.i ho
Leave a Reply