Sufi
bakhshe phir us nigah ne arman nae nae
mahsus ho rahe hain dil o jaan nae nae
yuun qaid-e-zindagi ne rakha muztarib hamen
jaise hue hon dakhil-e-zindan nae nae
kis kis se is amanat-e-din ko bachaiye
milte hain roz dushman-e-iman nae nae
rahat ki justuju men khushi ki talash men
gham palti hai umr-e-gurezan nae nae
masjid men aur zikr buton ka janab-e-shaikh
shayad hue hain aap musalman nae nae
dam bhar dam-e-ajal ko na hasil hua faragh
hote rahe charagh farozan nae nae
khana-kharab ham se jahan men kahan ‘adib’
abad kar rahe hain bayaban nae nae
Leave a Reply