asman surḳh hua nala-e-shab-gir ke ba.ad
hal-e-dil us pe khula hai baḌi taḳhir ke ba.ad
talab-e-ḳhvab men kitni thiin pareshan ankhen
kitni hairan hain ab ḳhvab ki ta.abir ke ba.ad
khul to sakte the miri aankh pe manzar ka.i aur
main ne dekha hi nahin kuchh tiri tasvir ke ba.ad
zindagi kaTti rahi aur mire pairon men
ek zanjir paḌi dusri zanjir ke ba.ad
ma.arka ab ke mohabbat men ajab guzra hai
haath ḳhali hi rahe lamha-e-tasḳhir ke ba.ad
kucha-e-harf men ye jaan ke aa.e ‘ḳhavar’
‘mir’ sa ‘mir’ se pahle na hua ‘mir’ ke ba.ad
Leave a Reply