is se pahle ki mujhe vaqt alahida rakh de
mere honTon pe mire naam ka bosa rakh de
halq se ab to utarta nahin ashkon ka namak
ab kisi aur ki gardan pe ye duniya rakh de
raushni apni shabahat hi bhula de na kahin
apne suraj ke sirhane mira saaya rakh de
tu kahan le ke phiregi miri taqdir ka bojh
meri palkon pe shab-e-hijr ye taara rakh de
mujh se le le mire qiston pe ḳharide hue din
mere lamhe men mira saara zamana rakh de
ham jo chalte hain to ḳhud banta chala jaata hai
laakh miTTi men chhupa kar koi rasta rakh de
ham ko azadi mili bhi to kuchh aise ‘nasik’
jaise kamre se koi sehn men pinjra rakh de
Leave a Reply