ham Thaharne ke nahin umr-e-ravan rakhte hain
vo zamin ghumti hai paanv jahan rakhte hain
dekhte sab hain magar band zaban rakhte hain
is tarah shahr men ham amn-o-aman rakhte hain
dil larazta hai to Darte hain kahin TuuT na jaa.e
shaḳh par ek hi to barg-e-ḳhizan rakhte hain
DhunD leta hai har ek shaḳhs hamen ham shayad
apne hone ka kahin koi nishan rakhte hain
kyuun nahin ḳhana-ba-doshon ki tarah ji lete
rehn rakhne ke liye ham bhi makan rakhte hain
bhuul ja paḌh ke puranon ki purani baten
ab vo sarmaya na.e log kahan rakhte hain
ishq ki ibtida aur intiha ham se puchho
phuul ko chuum ke kanTon pe zaban rakhte hain
Leave a Reply