misr fir.aun ki tahvil men aaya hua hai
ḳhuun paani ki jagah niil men aaya hua hai
vaqt be-vaqt jhalakta hai miri surat se
kaun chehra miri tashkil men aaya hua hai
pesh-bini hai ye ilham ke a.ine ki
aks qur.an ka injil men aaya hua hai
koi lamha mujhe tabdil kiye jaata hai
kya taghayyur miri takmil men aaya hua hai
sarguzisht-e-dil-e-tafrih-talab men janan
zikr tera kisi tafsil men aaya hua hai
meri ankhon men uge ḳhauf-zada zard kanval
shark ka aks miri jhiil men aaya hua hai
us ke mahsul pe dushman ki nazar hai ‘asim’
jo ilaqa miri tahsil men aaya hua hai
Leave a Reply